پاکستان نے جنوب مشرقی ایشیائی ممالک کے ساتھ پاکستان آسیان تعاون اور دیرینہ شراکت داری مزید مضبوط بنانے کے عزم کا اعادہ کیا ہے۔ نائب وزیراعظم اسحاق ڈار نے آسیان کے 59ویں یومِ تاسیس کے موقع پر یہ عزم ظاہر کیا۔
اسحاق ڈار نے حکومت اور عوام پاکستان کی جانب سے آسیان کے رکن ممالک کی حکومتوں اور عوام کو 59ویں سالگرہ پر مبارکباد اور نیک خواہشات پیش کیں۔ انہوں نے آسیان کے سیکریٹری جنرل ڈاکٹر کاؤ کم ہورن کو بھی علاقائی تعاون، استحکام اور خوشحالی کے فروغ کے لیے کوششوں پر مبارکباد دی۔
نائب وزیراعظم نے کہا کہ آسیان ڈے جنوب مشرقی ایشیا کی اقوام کو متحد کرنے والے اتحاد، یکجہتی اور تعاون کے جذبے کی عکاسی کرتا ہے۔ پاکستان اس موقع پر اپنے آسیان دوستوں کے ساتھ اظہار یکجہتی کرتے ہوئے خطے کے ساتھ دیرینہ تعلقات اور شراکت داری کی تجدید کرتا ہے۔
اسحاق ڈار نے آسیان کو علاقائی انضمام اور اجتماعی ترقی کی ایک اہم مثال قرار دیا۔ ان کے مطابق تنظیم نے اقتصادی ترقی، سماجی ہم آہنگی اور سفارتی روابط کے شعبوں میں نمایاں کامیابیاں حاصل کی ہیں، جبکہ پاکستان ایشیا بحرالکاہل میں امن، استحکام اور خوشحالی کے لیے آسیان کے کردار کو قدر کی نگاہ سے دیکھتا ہے۔
انہوں نے کہا کہ پاکستان آسیان تعاون باہمی احترام، عدم مداخلت اور تعمیری روابط کے اصولوں پر قائم ہے۔ پاکستان نے آسیان کے مختلف مکالماتی طریقہ کار میں فعال کردار ادا کیا ہے اور تجارت، سرمایہ کاری، تعلیم، ثقافت اور عوامی روابط میں تعاون مزید بڑھانے کے لیے پرعزم ہے۔
نائب وزیراعظم نے آسیان ریجنل فورم میں پاکستان کی فعال شرکت کا بھی ذکر کیا، جہاں اسلام آباد علاقائی امن، سلامتی اور تعاون کے لیے اجتماعی کوششوں میں کردار ادا کررہا ہے۔ انہوں نے کہا کہ یہ فورم مشترکہ علاقائی چیلنجز پر بات چیت کے لیے اہم پلیٹ فارم ہے۔
اسحاق ڈار نے کہا کہ بڑھتے عالمی چیلنجز اور غیر یقینی صورتحال میں آسیان کا مکالمے، باہمی مفاہمت اور پرامن تعاون کا عزم قابل تحسین ہے۔ پاکستان علاقائی امن، استحکام اور پائیدار ترقی کے لیے آسیان کے ساتھ قریبی تعاون جاری رکھے گا اور پاکستان آسیان تعاون کو مزید فروغ دے گا۔
