طوفان بوی چین کے مشرقی ساحلی علاقوں کی جانب بڑھ رہا ہے، جس کے پیش نظر حکام نے چھ لاکھ سے زائد افراد کو محفوظ مقامات پر منتقل کر دیا ہے۔ اگرچہ طوفان کی شدت کچھ کم ہوئی ہے، لیکن ماہرین کے مطابق اس کے وسیع بارشی نظام کی وجہ سے سیلاب اور لینڈ سلائیڈنگ کا خطرہ بدستور موجود ہے۔
چینی سرکاری میڈیا کے مطابق صوبہ ژیجیانگ سے پانچ لاکھ سے زائد افراد کا انخلا کیا گیا، جبکہ ہمسایہ صوبہ فوجیان سے ایک لاکھ سے زیادہ افراد کو محفوظ مقامات پر منتقل کیا گیا۔ طوفان کے اتوار کی صبح تقریباً ایک کروڑ آبادی والے شہر وینژو کے قریب ٹکرانے کی پیش گوئی کی گئی ہے۔
محکمہ موسمیات نے بتایا کہ طوفان بوی شمال مغرب کی جانب بڑھتے ہوئے نسبتاً سست اور کمزور ضرور ہوا ہے، تاہم اس کے بارشی بادلوں میں موجود نمی کی مقدار اب بھی غیر معمولی ہے۔ ماہرین نے شدید بارشوں، سیلاب اور لینڈ سلائیڈنگ کے خدشات ظاہر کیے ہیں۔
وینژو میں شہریوں نے احتیاطی تدابیر اختیار کرتے ہوئے پینے کے پانی اور ضروری اشیائے خورونوش کا ذخیرہ کر لیا۔ مقامی انتظامیہ نے عوام کو یقین دلایا کہ ضروری سامان کی فراہمی برقرار ہے اور غیر ضروری ذخیرہ اندوزی سے گریز کرنے کی اپیل کی۔
چین پہنچنے سے قبل طوفان بوی نے جاپان کے جنوبی جزائر ساکیشیما میں شدید بارشیں اور تیز ہوائیں چلائیں جبکہ شمالی تائیوان کے قریب سے بھی گزرا۔ جاپان اور تائیوان میں کسی ہلاکت کی اطلاع نہیں ملی، تاہم فلپائن میں طوفان سے منسلک شدید بارشوں کے باعث 17 افراد جان کی بازی ہار گئے۔
تائیوان میں احتیاطی اقدامات کے تحت 14 ہزار سے زائد افراد کو پہاڑی علاقوں سے منتقل کیا گیا۔ تقریباً 920 بین الاقوامی اور تمام 282 اندرون ملک پروازیں منسوخ کر دی گئیں، جبکہ بیشتر شہروں میں اسکول اور سرکاری دفاتر بند رہے۔ اگرچہ طوفان نے براہِ راست تائیوان سے ٹکراؤ نہیں کیا، پھر بھی شدید بارشوں کے خدشے کے باعث ہنگامی اقدامات کیے گئے۔
طوفان بوی چین کے ساحلی علاقوں کے قریب پہنچنے کے ساتھ ہی امدادی ادارے مکمل طور پر متحرک ہیں۔ حکام نے عوام کو گھروں میں رہنے، سرکاری ہدایات پر عمل کرنے اور ممکنہ سیلاب، تیز ہواؤں اور سفری رکاوٹوں کے لیے تیار رہنے کی ہدایت کی ہے۔
