برطانیہ نے پاکستان کو تجارت، سرمایہ کاری اور نجی شعبے میں اصلاحات کیلئے تکنیکی معاونت فراہم کرنے کی پیشکش کی ہے۔ اس پیشکش پر پاکستان کی معاشی اصلاحات اور دونوں ممالک کے درمیان تجارتی و سرمایہ کاری تعاون بڑھانے کے حوالے سے بات چیت ہوئی۔
برطانوی ہائی کمشنر جین میریٹ نے وفاقی وزیر خزانہ محمد اورنگزیب سے ملاقات کی۔ ملاقات میں پاکستان کے معاشی اصلاحاتی ایجنڈے اور ادارہ جاتی و پالیسی نظام کو بہتر بنانے کے اقدامات پر تبادلہ خیال کیا گیا۔ ڈویلپمنٹ ڈائریکٹر سیم والڈک اور سینئر اکانومسٹ لوئی ڈین بھی موجود تھے۔
محمد اورنگزیب نے معاشی اصلاحات کیلئے برطانیہ کی مسلسل حمایت کو سراہا۔ انہوں نے کہا کہ پاکستان استحکام سے پائیدار اور جامع ترقی کی جانب بڑھ رہا ہے، جبکہ پیداواری صلاحیت، سرمایہ کاری، برآمدات اور روزگار پر زیادہ توجہ دی جا رہی ہے۔
برطانوی ہائی کمشنر نے پاکستان کی معاشی تبدیلی میں تعاون جاری رکھنے میں دلچسپی کا اظہار کیا۔ پاکستان کیلئے برطانیہ کی تکنیکی معاونت کا مقصد سرمایہ کاری، تجارت اور نجی شعبے کی ترقی کیلئے ادارہ جاتی اور پالیسی نظام کو مضبوط بنانا ہے۔
جین میریٹ نے پاکستان کی جانب سے 3 ارب ڈالر کے ڈوئل ٹرانچ خودمختار یورو بانڈ کے کامیاب اجرا کو بھی سراہا۔ ان کے مطابق اس سے سرمایہ کاروں کے اعتماد اور عالمی مالیاتی منڈیوں تک رسائی کی اہمیت اجاگر ہوتی ہے۔ دونوں فریقوں نے برطانوی تعاون کو پاکستان کی ترجیحات سے ہم آہنگ کرنے پر زور دیا۔
ملاقات میں مالیاتی انتظام، ٹیکس نظام، ڈیجیٹلائزیشن، اخراجات میں بہتری، تجارت و سرمایہ کاری کے فروغ اور پبلک پرائیویٹ پارٹنرشپس سمیت مختلف اصلاحاتی شعبوں پر گفتگو ہوئی۔ وزیر خزانہ نے اداروں کے درمیان مؤثر رابطے کی اہمیت پر زور دیا۔
دونوں ممالک نے دوطرفہ تجارت اور برطانوی کاروباری اداروں کی پاکستان میں شمولیت بڑھانے کے مواقع پر بھی تبادلہ خیال کیا۔ ہوا بازی کے شعبے میں ممکنہ سرمایہ کاری اور بین الاقوامی مالی معاونت بھی زیر بحث آئی۔ برطانوی فریق نے صوبائی سطح سمیت متعلقہ شعبوں میں تکنیکی مہارت فراہم کرنے میں دلچسپی ظاہر کی۔
