چینی صدر شی جن پنگ ہفتے کو شی جن پنگ برکس اجلاس میں شرکت کیلئے نئی دہلی پہنچ گئے، جہاں بھارت، روس اور ایران سمیت 11 رکنی گروپ کے رہنما اور نمائندے شریک ہیں۔ دو روزہ اجلاس میں جنگوں، عالمی تجارت اور توانائی سے متعلق معاملات اہم موضوعات رہیں گے۔
مشرق وسطیٰ اور یوکرین کی جنگوں کے ساتھ عالمی تجارتی صورتحال اور توانائی کا تحفظ بھی اجلاس کے ایجنڈے میں نمایاں ہوگا۔ برکس کے رکن ممالک بڑے عالمی تنازعات پر مختلف مؤقف رکھتے ہیں، جس کے باعث مشترکہ مؤقف اختیار کرنا مشکل ہوسکتا ہے۔
شی جن پنگ کا دورہ چین اور بھارت کے تعلقات کے حوالے سے بھی اہم قرار دیا جارہا ہے۔ یہ 2019 کے بعد ان کا بھارت کا پہلا دورہ ہے اور دونوں جوہری طاقتوں کے درمیان محتاط انداز میں بہتر ہوتے تعلقات میں ایک اہم پیش رفت سمجھا جارہا ہے۔ نئی دہلی پہنچنے پر چینی صدر کا شاندار استقبال کیا گیا۔
چین اور بھارت کے تعلقات کو 2020 میں متنازع ہمالیائی سرحد پر ہونے والی مہلک جھڑپ کے بعد شدید مشکلات کا سامنا رہا۔ بعد میں دونوں ممالک نے پروازیں، ویزا سہولیات اور اعلیٰ سطح کے رابطے بحال کیے، تاہم سرحدی تنازع اب بھی حل طلب ہے۔ تقریباً 3,500 کلومیٹر طویل سرحد پر دونوں ممالک کی فوجی موجودگی بھی برقرار ہے۔
شی جن پنگ اپنے دورے کے دوران بھارتی وزیراعظم نریندر مودی سے براہ راست ملاقات بھی کریں گے۔ ماہرین کے مطابق دونوں ممالک سرحدی تنازع پر پیش رفت کے ساتھ اقتصادی اور عوامی روابط بہتر بنانے کی کوشش کرسکتے ہیں۔ تاہم باہمی بداعتمادی، سرحدی مسئلہ اور چین کے ساتھ بھارت کا بڑھتا تجارتی خسارہ تعلقات کیلئے چیلنج ہیں۔
شی جن پنگ برکس اجلاس میں مشرق وسطیٰ کے تنازع پر مختلف مؤقف رکھنے والے ممالک بھی شریک ہیں۔ ایران برکس کا رکن ہے جبکہ سعودی عرب اور متحدہ عرب امارات بھی گروپ میں شامل ہیں۔ بھارت ایران، اسرائیل اور امریکا کے ساتھ تعلقات میں توازن برقرار رکھنے کے ساتھ روس کے ساتھ بھی اسٹریٹجک شراکت داری جاری رکھے ہوئے ہے۔
برکس کے اندر موجود اختلافات عالمی تنازعات پر مشترکہ مؤقف اختیار کرنے کی کوششوں کو متاثر کرسکتے ہیں۔ مئی میں نئی دہلی میں ہونے والے وزرائے خارجہ کے اجلاس میں بھی مشترکہ اعلامیے پر اتفاق نہیں ہوسکا تھا۔ اب مشرق وسطیٰ کی جنگ برکس کے اندر اختلافات اور اتفاق رائے قائم کرنے کی صلاحیت کا ایک بڑا امتحان بن سکتی ہے۔
