اسلام آباد: وزیراعظم شہباز شریف نے خیبرپختونخوا میں امن و امان، دہشت گردی کے بڑھتے واقعات اور انتظامی چیلنجز کا جائزہ لینے کے لیے وفاقی کابینہ کا اہم اجلاس طلب کرلیا ہے۔ اجلاس میں صوبے کی موجودہ صورتحال اور امن و استحکام کے لیے ممکنہ اقدامات پر غور متوقع ہے۔
حکومتی ذرائع کے مطابق وزیراعظم شہباز شریف اجلاس کی صدارت کریں گے، جس میں وفاقی وزرا شرکت کریں گے۔ کابینہ کو خیبرپختونخوا میں سکیورٹی سے متعلق تازہ پیش رفت اور انتظامی معاملات پر بریفنگ دیے جانے کا امکان ہے۔
اجلاس کے اہم نکات میں صوبے میں امن و امان کی صورتحال اور دہشت گردی کے بڑھتے ہوئے واقعات شامل ہیں۔ وفاقی وزرا سکیورٹی اداروں کو درپیش چیلنجز اور دہشت گردی کی روک تھام کے لیے ضروری اقدامات کا جائزہ لے سکتے ہیں۔
ذرائع کے مطابق خیبرپختونخوا میں گورننس، انتظامی امور اور امن کی بحالی سے متعلق معاملات بھی زیر بحث آئیں گے۔ اجلاس میں متعلقہ اداروں کے درمیان مؤثر رابطہ کاری اور صوبے میں استحکام کے لیے ممکنہ حکمت عملی پر غور کیے جانے کی توقع ہے۔
اس موقع پر پولیس اور حساس اداروں کی خصوصی رپورٹس وزیراعظم اور وفاقی کابینہ کے سامنے پیش کیے جانے کا بھی امکان ہے۔ ان رپورٹس میں صوبے کی سکیورٹی صورتحال، درپیش خطرات اور اہم انتظامی امور سے متعلق تفصیلات شامل ہوسکتی ہیں۔
خیبرپختونخوا میں سکیورٹی اور انتظامی مسائل کے تناظر میں وفاقی کابینہ کا یہ اجلاس اہمیت اختیار کرگیا ہے۔ اجلاس کے دوران دہشت گردی سے نمٹنے، امن و امان بہتر بنانے اور متعلقہ اداروں کے درمیان تعاون مضبوط کرنے کے لیے مختلف تجاویز کا جائزہ لیا جاسکتا ہے۔
