بحیرہ احمر میں حوثی حملہ ہوا ہے جس میں تین پاکستانی شہری جاں بحق اور ایک زخمی ہوگیا۔ نائب وزیراعظم اور وزیر خارجہ اسحاق ڈار نے بدھ کو واقعے کی تصدیق کردی۔
حملے میں تنزانیہ کے پرچم والے تجارتی جہاز ’تہامہ‘ کو نشانہ بنایا گیا۔ واقعے میں ایک انڈونیشی شہری سمیت عملے کے دیگر افراد بھی متاثر ہوئے۔
اسحاق ڈار نے حملے کی شدید مذمت کرتے ہوئے پاکستانی شہریوں کے اہلخانہ سے دلی تعزیت کا اظہار کیا۔ انہوں نے کہا کہ پاکستان تجارتی جہازوں پر حملوں کی سختی سے مذمت کرتا ہے۔
انہوں نے کہا کہ بحیرہ احمر میں حوثی حملہ بے گناہ انسانی جانوں کے لیے خطرہ ہے۔ ایسے حملے بین الاقوامی قوانین کی خلاف ورزی اور بحری سلامتی کے لیے سنگین خطرہ ہیں۔
اسحاق ڈار کے مطابق پاکستان سعودی حکام اور یمن کی تسلیم شدہ حکومت سے رابطے میں ہے۔ حکام واقعے کی مزید تفصیلات اور حملے کے حالات معلوم کرنے کی کوشش کررہے ہیں۔
وزیر خارجہ نے ریاض میں پاکستانی سفارتخانے کو متعلقہ حکام سے فوری رابطے کی ہدایت کی۔ انہوں نے جاں بحق پاکستانیوں کی میتیں واپس لانے کے لیے ضروری اقدامات کرنے کا حکم دیا۔
اسحاق ڈار نے زخمی پاکستانی شہری کو ہر ممکن مدد فراہم کرنے کی بھی ہدایت کی۔ پاکستان صورتحال پر نظر رکھے گا اور بحیرہ احمر میں حوثی حملہ کے بعد متعلقہ حکام سے مسلسل رابطے میں رہے گا۔
