لاہور: پاکستان کرکٹ ٹیم کے ہیڈ کوچ مائیک ہیسن نے سہ ملکی کرکٹ سیریز کے فائنل میں سری لنکا کے خلاف کامیابی کے بعد قومی ٹیم کے کھلاڑیوں اور سپورٹ اسٹاف کی کارکردگی کو سراہتے ہوئے ٹیم کی مسلسل پیش رفت پر خوشی کا اظہار کیا ہے۔
مائیک ہیسن نے سوشل میڈیا پر اپنے پیغام میں کہا کہ یہ دیکھ کر خوشی ہوتی ہے کہ بطور ٹیم پاکستان کا آگے بڑھنے کا سفر مسلسل جاری ہے۔ ان کے مطابق کھلاڑیوں کی مشترکہ کوششیں ٹیم کی بہتری اور کامیابی میں اہم کردار ادا کررہی ہیں۔
ہیڈ کوچ کا کہنا تھا کہ کھلاڑی ہر چیلنج کا بھرپور مقابلہ کرنے کے لیے آگے آرہے ہیں اور مشکل حالات میں اپنی ذمہ داریاں نبھانے کے لیے تیار ہیں۔ انہوں نے قومی کھلاڑیوں کی محنت اور میدان میں دکھائی جانے والی کارکردگی کو بھی سراہا۔
مائیک ہیسن نے ٹیم کے سپورٹ اسٹاف کو بھی خصوصی طور پر خراج تحسین پیش کیا۔ ان کا کہنا تھا کہ پاکستان ٹیم کے ساتھ کام کرنے والا سپورٹ اسٹاف نہ صرف انتہائی باصلاحیت ہے بلکہ سخت محنت بھی کررہا ہے اور اس کی خدمات خصوصی تعریف کی مستحق ہیں۔
واضح رہے کہ لاہور کے قذافی اسٹیڈیم میں پاکستان، سری لنکا اور انگلینڈ کے درمیان کھیلی جانے والی سہ ملکی سیریز کے فائنل میں پاکستان نے سری لنکا کو تین وکٹوں سے شکست دے کر ٹائٹل اپنے نام کیا تھا۔
فائنل میں قومی ٹیم نے سات وکٹوں کے نقصان پر کامیابی حاصل کی اور ٹورنامنٹ کی ٹرافی جیت لی۔ سری لنکا کے خلاف اس کامیابی کے بعد قومی ٹیم اور اس کے سپورٹ اسٹاف کی کارکردگی کو خاصی اہمیت حاصل ہوئی ہے۔
