کراچی: وزیراعلیٰ سندھ مراد علی شاہ نے ملک میں نئے صوبوں کے قیام کی تجویز کی مخالفت کرتے ہوئے ایک بار پھر واضح کیا ہے کہ پاکستان اپنے موجودہ چار صوبوں کے ساتھ ہی قائم و دائم رہے گا۔ انہوں نے سندھ کو پاکستان کے قیام میں اہم کردار ادا کرنے والے بانی صوبوں میں شامل قرار دیا۔
کراچی میں ایک تقریب سے خطاب کرتے ہوئے مراد علی شاہ نے کہا کہ یوم شہدا، یوم فضائیہ اور سلام پاکستان کے حوالے سے تقریبات قومی جذبے کے ساتھ جاری ہیں۔ ان تقریبات کا مقصد ملک کے لیے جان قربان کرنے والے شہدا اور قومی ہیروز کو خراج عقیدت پیش کرنا ہے۔
وزیراعلیٰ سندھ نے کہا کہ سندھ پاکستان بنانے والے ان علاقوں میں شامل ہے جنہوں نے قیام پاکستان کے لیے اہم کردار ادا کیا۔ ان کے مطابق ملک کی موجودہ صوبائی ساخت کو برقرار رکھنا ضروری ہے اور مراد علی شاہ نئے صوبوں کی مخالفت کے اپنے مؤقف پر بدستور قائم ہیں۔
مراد علی شاہ نے بلدیاتی نظام پر بات کرتے ہوئے کہا کہ سندھ میں باقاعدہ لوکل باڈیز سسٹم موجود ہے۔ ان کا دعویٰ تھا کہ ملک کے دیگر صوبوں میں سندھ جیسا بلدیاتی نظام موجود نہیں، جس کے ذریعے مقامی سطح پر انتظامی امور چلائے جا رہے ہیں۔
نئے صوبوں کے معاملے پر وزیراعلیٰ سندھ کا یہ مؤقف ایسے وقت میں سامنے آیا ہے جب ملک میں انتظامی بنیادوں پر مزید صوبے بنانے کی تجاویز ایک مرتبہ پھر زیر بحث ہیں۔ تاہم سندھ حکومت ماضی میں بھی ایسی تجاویز کی مخالفت کرتی رہی ہے۔
چند روز قبل بھی مراد علی شاہ نے نئے صوبوں سے متعلق وزیر داخلہ محسن نقوی کی تجویز پر ردعمل دیا تھا۔ انہوں نے اس تجویز کو مسترد کرتے ہوئے کہا تھا کہ مزید صوبوں کے قیام کی بات کوئی نئی تجویز نہیں بلکہ ایک پرانا مؤقف ہے جو وقتاً فوقتاً سامنے آتا رہتا ہے۔
