لاہور: لاہور کی تاجر برادری کی نمایاں تنظیموں پائنیرز بزنس مین گروپ (PBG)، فاؤنڈرز گروپ، لاہور بزنس مین فرنٹ (LBF) اور ناصر حمید خان گروپ نے آئندہ لاہور چیمبر آف کامرس اینڈ انڈسٹری کے انتخابات مشترکہ اتحاد کے تحت لڑنے کا باضابطہ اعلان کر دیا ہے۔
رہنماؤں کا کہنا ہے کہ اس اتحاد کا مقصد ذاتی یا گروہی مفادات نہیں بلکہ لاہور کی کاروباری برادری کے مشترکہ مفادات کا تحفظ اور لاہور چیمبر کے فعال کردار کو مزید مؤثر بنانا ہے۔
لاہور میں مشترکہ پریس کانفرنس سے خطاب کرتے ہوئے اتحاد کے چیئرمین میاں مصباح الرحمٰن، فاؤنڈرز گروپ کے چیئرمین شیخ ابراہیم، پائنیرز بزنس مین گروپ کے چیئرمین علی حسام اصغر، لاہور بزنس مین فرنٹ کے چیئرمین چوہدری امجد اور ناصر حمید خان نے کہا کہ موجودہ معاشی حالات میں کاروباری طبقے کو ایک مضبوط، متحد اور بااعتماد قیادت کی ضرورت ہے جو تاجروں اور صنعتکاروں کے مسائل کو مؤثر انداز میں حکومتی اداروں تک پہنچا سکے۔
رہنماؤں نے کہا کہ لاہور چیمبر انتخابات اتحاد تجربہ کار قیادت اور نوجوان وژن کا حسین امتزاج ہے، جو لاہور چیمبر میں مثبت اور نتیجہ خیز تبدیلی لانے کی صلاحیت رکھتا ہے۔ ان کے مطابق ماضی میں لاہور چیمبر ملکی کاروباری برادری کی ایک مضبوط آواز سمجھا جاتا تھا، تاہم گزشتہ برسوں میں اس کا کردار محدود ہوا، جسے دوبارہ مؤثر اور فعال بنانے کی ضرورت ہے۔
اتحاد کے قائدین نے اس عزم کا اظہار کیا کہ کامیابی کی صورت میں لاہور چیمبر میں شفافیت، میرٹ، احتساب، مشاورت اور ادارہ جاتی استحکام کو اولین ترجیح دی جائے گی۔ انہوں نے کہا کہ ہر رکن کو مساوی عزت اور نمائندگی دی جائے گی جبکہ چیمبر کی پالیسیوں اور سرگرمیوں کو ممبران کی ضروریات اور کاروباری برادری کے وسیع تر مفاد کے مطابق ترتیب دیا جائے گا۔
انہوں نے مزید کہا کہ صنعتکاروں، تاجروں، برآمد کنندگان، درآمد کنندگان، ایس ایم ایز، خواتین کاروباری شخصیات اور نوجوان کاروباری افراد کو درپیش چیلنجز کے حل کے لیے لاہور چیمبر کو ایک فعال پالیسی ساز ادارے کا کردار ادا کرنا ہوگا۔ حکومت کے ساتھ مسلسل رابطہ، کاروبار دوست قوانین، ٹیکس اصلاحات، سرمایہ کاری میں اضافہ اور برآمدات کے فروغ کے لیے اتحاد عملی اقدامات کرے گا تاکہ ملکی معیشت کو بھی مضبوط بنایا جا سکے۔
پریس کانفرنس میں رہنماؤں نے اس بات پر بھی زور دیا کہ اتحاد کا مقصد کسی قسم کی تقسیم پیدا کرنا نہیں بلکہ پوری کاروباری برادری کو ایک پلیٹ فارم پر متحد کرنا ہے۔ ان کے مطابق اتفاق، خدمت، دیانت اور میرٹ پر مبنی قیادت ہی لاہور چیمبر کو دوبارہ ایک مؤثر، باوقار اور بااثر ادارہ بنا سکتی ہے جس کی آواز قومی سطح پر سنی جائے۔
پریس کانفرنس کے اختتام پر اتحاد کی قیادت نے لاہور چیمبر آف کامرس اینڈ انڈسٹری کے تمام اراکین سے اپیل کی کہ وہ اس مشترکہ اتحاد کا ساتھ دیں تاکہ تجربہ، بصیرت اور نوجوان قیادت کے امتزاج سے لاہور چیمبر کو نئی سمت، نئی توانائی اور مؤثر شناخت دی جا سکے۔ رہنماؤں نے اس عزم کا اعادہ کیا کہ وہ باہمی مشاورت، شفاف طرزِ قیادت اور خدمت کے جذبے کے ساتھ کاروباری برادری کی حقیقی نمائندگی کے لیے بھرپور کردار ادا کرتے رہیں گے۔
