سندھ حکومت نے میر رضا قتل کیس کی تحقیقات کرنے والے جوڈیشل کمیشن کی مدت میں توسیع کردی ہے۔ کمیشن کو اب رپورٹ جمع کرانے کے لیے 15 اکتوبر تک مزید وقت دے دیا گیا ہے۔

یہ فیصلہ وزیراعلیٰ سندھ مراد علی شاہ کی زیر صدارت سندھ کابینہ کے اجلاس میں کیا گیا۔ اجلاس میں کمیشن کی تحقیقات میں پیش رفت اور مزید مہلت کی درخواست کا جائزہ لیا گیا۔

سندھ کابینہ نے انکوائری کمیشن کی رپورٹ جمع کرانے کی تاریخ 15 اکتوبر تک بڑھانے کی منظوری دی۔ توسیع کا مقصد میر رضا قتل کیس سے متعلق باقی کارروائی مکمل کرنے کے لیے کمیشن کو اضافی وقت فراہم کرنا ہے۔

کابینہ کو بریفنگ میں بتایا گیا کہ کمیشن اب تک وسیع پیمانے پر کارروائی کرچکا ہے۔ تحقیقات کے دوران درجنوں گواہوں کے بیانات بھی قلمبند کیے جاچکے ہیں۔

ترجمان وزیراعلیٰ سندھ کے مطابق کمیشن کو تحقیقات مکمل کرنے اور سفارشات مرتب کرنے کے لیے مزید مہلت دی گئی ہے۔ اس اضافی وقت میں کمیشن اپنی باقی کارروائی مکمل کرکے رپورٹ تیار کرے گا۔

جوڈیشل کمیشن نے اس سے قبل گواہوں کے بیانات مکمل کرنے اور رپورٹ مرتب کرنے کے لیے مدت میں توسیع کی درخواست کی تھی۔ کمیشن نے رپورٹ جمع کرانے کے لیے 15 اکتوبر تک وقت مانگا تھا۔

کمیشن کی درخواست پر محکمہ داخلہ سندھ نے رپورٹ جمع کرانے کی مدت میں توسیع کی سمری تیار کرکے کابینہ کو بھجوائی۔ سندھ کابینہ کی منظوری کے بعد میر رضا قتل کیس کی تحقیقات مکمل کرنے کے لیے کمیشن کو 15 اکتوبر تک مزید وقت مل گیا ہے۔