سوات خودکش دھماکہ میں جاں بحق افراد کی تعداد پیر کے روز بڑھ کر 19 ہو گئی، جب مزید چار زخمی دورانِ علاج دم توڑ گئے۔ یہ حملہ کبل پولیس اسٹیشن کے قریب اس وقت ہوا جب علاقے میں امن و امان کی صورتحال کے خلاف احتجاج جاری تھا، جس کے نتیجے میں متعدد افراد زخمی بھی ہوئے۔
پولیس کے مطابق خودکش حملہ آور نے اس وقت خود کو دھماکے سے اڑا لیا جب اہلکاروں نے اسے پولیس اسٹیشن کے داخلی راستے پر روک کر تلاشی لینے کی کوشش کی۔ ابتدائی طور پر دھماکے میں 15 افراد، جن میں پولیس اہلکار بھی شامل تھے، جاں بحق ہوئے جبکہ 18 افراد زخمی ہوئے تھے۔ بعد ازاں مزید چار زخمی جانبر نہ ہو سکے۔
دھماکے کے فوراً بعد ریسکیو 1122 کی ٹیموں نے بڑے پیمانے پر امدادی کارروائیاں شروع کیں۔ پچاس سے زائد اہلکاروں نے جائے وقوعہ پر ابتدائی طبی امداد فراہم کی اور زخمیوں کو مختلف اسپتالوں میں منتقل کیا۔ حکام کے مطابق سوات خودکش دھماکہ کی تحقیقات جاری ہیں جبکہ زخمیوں کو بہترین طبی سہولیات فراہم کی جا رہی ہیں۔
دھماکے میں شہید ہونے والے کانسٹیبل مکرم خان اور کانسٹیبل حسین خان کی نماز جنازہ جاوید اقبال شہید پولیس لائنز میں ادا کی گئی۔ پولیس کے چاق و چوبند دستے نے شہدا کو گارڈ آف آنر پیش کیا جبکہ اعلیٰ پولیس افسران نے ان کی قربانیوں کو خراجِ عقیدت پیش کیا۔
خیبر پختونخوا کے وزیر اعلیٰ سہیل آفریدی نے سوات کا دورہ کیا اور شہدا کے اہل خانہ اور زخمیوں سے ملاقات کی۔ انہوں نے یقین دلایا کہ صوبائی حکومت زخمیوں کو بہترین علاج فراہم کرے گی۔ اعلیٰ سطح کے اجلاس میں امن و امان کی صورتحال کا جائزہ لیا گیا اور دہشت گردی کے خلاف اقدامات مزید مؤثر بنانے کا عزم ظاہر کیا گیا۔
وزیر اعلیٰ نے کہا کہ دہشت گردی کے خاتمے کے لیے تمام سیاسی، مذہبی اور سماجی قوتوں کو متحد ہونا ہوگا۔ انہوں نے اعلان کیا کہ خیبر پختونخوا پولیس کی استعداد بڑھانے اور دہشت گردی کے خلاف کارروائیوں کے لیے 20 ارب روپے مختص کیے گئے ہیں۔
ادھر وکلا، تاجروں اور شہری تنظیموں نے حملے کی شدید مذمت کرتے ہوئے ہڑتال کی اور امن کے حق میں احتجاج کا اعلان کیا۔ کبل میں کاروباری مراکز بند رہے جبکہ 7 اگست کو مینگورہ میں دہشت گردی کے خلاف بڑا احتجاجی مظاہرہ کرنے کا اعلان کیا گیا۔ سوات خودکش دھماکہ نے ایک بار پھر خیبر پختونخوا میں بڑھتے ہوئے سیکیورٹی خدشات کو نمایاں کر دیا۔
