راولپنڈی: چیف آف ڈیفنس فورسز فیلڈ مارشل سید عاصم منیر کی جانب سے یومِ آزادی کے موقع پر پاک فوج کے سابق فوجیوں کے اعزاز میں خصوصی استقبالیہ دیا گیا، جس میں سابق آرمی چیفس سمیت بڑی تعداد میں ریٹائرڈ فوجی افسران اور جوانوں نے شرکت کی۔
پاک فوج کے شعبہ تعلقات عامہ (آئی ایس پی آر) کے مطابق استقبالیے کا مقصد ملکی دفاع اور قومی خدمت میں سابق فوجیوں کی خدمات کو خراجِ تحسین پیش کرنا تھا۔ فیلڈ مارشل عاصم منیر نے ملک کے دفاع کے لیے سابق فوجیوں کی قربانیوں اور خدمات کو سراہا۔
فیلڈ مارشل عاصم منیر نے قومی استقامت مضبوط بنانے میں سابق فوجیوں کے کردار کو بھی اجاگر کیا۔ ان کا کہنا تھا کہ پیچیدہ اور بدلتے ہوئے سکیورٹی ماحول میں سابق فوجیوں کا تجربہ اور رہنمائی ایک قیمتی ادارہ جاتی اثاثہ ہے۔
استقبالیے میں سابق آرمی چیفس کے علاوہ پاک فوج کے ریٹائرڈ افسران اور جوانوں کی بڑی تعداد شریک ہوئی۔ تقریب نے سابق اور موجودہ فوجی قیادت کے درمیان دیرینہ تعلق اور ملکی دفاع کے لیے مشترکہ عزم کو بھی اجاگر کیا۔
آئی ایس پی آر کے مطابق سابق فوجیوں نے پاک فوج کی قیادت پر اپنے اعتماد کا اظہار کیا اور ابھرتے ہوئے سکیورٹی چیلنجز سے نمٹنے کے لیے فوج کے ساتھ اپنی مسلسل حمایت کا اعادہ کیا۔ سابق فوجیوں نے ملکی سلامتی اور استحکام کے لیے اپنے تعاون کو جاری رکھنے کے عزم کا اظہار بھی کیا۔
سابق فوجیوں نے قومی اتحاد، امن اور خوشحالی کے لیے اپنا کردار جاری رکھنے کے عزم کا اظہار کیا۔ انہوں نے اس بات پر زور دیا کہ پاکستان کو درپیش چیلنجز سے نمٹنے کے لیے قومی یکجہتی اور باہمی تعاون ضروری ہے۔
