انسداد دہشت گردی عدالت نے 9 مئی کیس میں اہم فیصلہ سناتے ہوئے پاکستان تحریک انصاف کے وائس چیئرمین شاہ محمود قریشی کو بری کر دیا جبکہ پارٹی کے کئی سینئر رہنماؤں کو 10، 10 سال قید کی سزا سنا دی۔ فیصلہ ہفتے کے روز کوٹ لکھپت جیل میں قائم عدالت میں سنایا گیا۔
عدالت نے ڈاکٹر یاسمین راشد، میاں محمود الرشید، اعجاز چوہدری اور عمر سرفراز چیمہ کو مجرم قرار دیتے ہوئے 10 سال قید کی سزا دی۔ مقدمے کی سماعت انسداد دہشت گردی عدالت کے جج منظر علی گل نے کی، جبکہ فیصلہ سکیورٹی وجوہات کے باعث جیل میں سنایا گیا۔
یہ 9 مئی کیس لاہور کے علاقے مغل پورہ میں پولیس گاڑیوں کو نذر آتش کرنے کے الزام سے متعلق تھا۔ استغاثہ کے مطابق ملزمان نے ان احتجاجی مظاہروں میں کردار ادا کیا جن کے دوران سرکاری املاک اور پولیس گاڑیوں کو نقصان پہنچایا گیا۔
یہ احتجاج 9 مئی 2023 کو پی ٹی آئی بانی عمران خان کی گرفتاری کے بعد ملک بھر میں شروع ہوئے تھے۔ مختلف شہروں میں مظاہرین اور قانون نافذ کرنے والے اداروں کے درمیان کشیدگی دیکھنے میں آئی، جس کے بعد بڑے پیمانے پر کریک ڈاؤن کیا گیا۔
استغاثہ نے مقدمے کے دوران 37 گواہان کے بیانات قلمبند کروائے، جن پر وکلا نے جرح بھی کی۔ دونوں فریقین کے حتمی دلائل مکمل ہونے کے بعد عدالت نے فیصلہ محفوظ کر لیا تھا، جو اب سنا دیا گیا ہے۔
چالان کے مطابق اس مقدمے میں مجموعی طور پر 22 افراد کو نامزد کیا گیا تھا۔ عدالت نے اس مرحلے پر 15 ملزمان کے خلاف فیصلہ سنایا جبکہ دو ملزمان کو پہلے ہی اشتہاری قرار دیا جا چکا تھا۔ دیگر قانونی کارروائیاں الگ مراحل میں جاری رہیں گی۔
یہ فیصلہ ایسے وقت میں سامنے آیا ہے جب جیل میں موجود بعض پی ٹی آئی رہنماؤں نے حال ہی میں سیاسی استحکام، آئینی بالادستی اور جمہوری عمل کے فروغ کے لیے "چارٹر آف پاکستان” کی تجویز پیش کی تھی۔ تاہم 9 مئی کیس کا فیصلہ ملکی سیاسی منظرنامے میں ایک اہم پیش رفت کے طور پر دیکھا جا رہا ہے۔
