میکی سال وزیراعظم شہباز ملاقات کے دوران پاکستان نے کثیرالجہتی تعاون اور اقوام متحدہ کے مرکزی کردار کی بھرپور حمایت کا اعادہ کیا۔ وزیراعظم شہباز شریف نے جمعہ کو وزیراعظم ہاؤس میں سینیگال کے سابق صدر اور اقوام متحدہ کے سیکریٹری جنرل کے امیدوار میکی سال کا خیرمقدم کیا، جہاں عالمی امن، ترقی اور بین الاقوامی تعاون سے متعلق امور پر تبادلہ خیال کیا گیا۔
وزیراعظم آفس کے جاری کردہ بیان کے مطابق وزیراعظم شہباز شریف نے اقوام متحدہ کے لیے پاکستان کی دیرینہ حمایت کو دہرایا اور کہا کہ عالمی مسائل کے مؤثر حل کے لیے مضبوط کثیرالجہتی نظام ناگزیر ہے۔
وزیراعظم نے امید ظاہر کی کہ اقوام متحدہ کی آئندہ قیادت بین الاقوامی امن و سلامتی، ترقی اور انسانی حقوق کے تین بنیادی ستونوں کو متوازن انداز میں آگے بڑھائے گی اور عالمی ادارے کی مؤثر کارکردگی کو مزید مضبوط بنائے گی۔
شہباز شریف نے اقوام متحدہ کے منشور کے مقاصد اور اصولوں سے پاکستان کی وابستگی کا اعادہ کرتے ہوئے کہا کہ سلامتی کونسل کی قراردادوں پر من و عن عمل درآمد، بین الاقوامی قانون اور معاہدوں کا احترام عالمی امن، سلامتی اور خوشحالی کے لیے انتہائی ضروری ہے۔
ملاقات کے دوران میکی سال نے اقوام متحدہ میں پاکستان کی طویل خدمات اور عالمی امن کے فروغ میں اس کے مثبت کردار کو سراہا۔ انہوں نے کہا کہ پاکستان نے ہمیشہ بین الاقوامی تعاون اور سفارتی روابط کو مضبوط بنانے میں تعمیری کردار ادا کیا ہے۔
یہ ملاقات ایسے وقت میں ہوئی ہے جب اقوام متحدہ کے اگلے سیکریٹری جنرل کے انتخاب کے لیے مختلف امیدوار سفارتی سطح پر مختلف ممالک سے رابطے کر رہے ہیں تاکہ اپنی حمایت کو مزید مستحکم بنایا جا سکے۔
پاکستان مسلسل ایک مؤثر، فعال اور مضبوط اقوام متحدہ کی حمایت کرتا آیا ہے جو عالمی تنازعات کے حل، پائیدار ترقی اور بین الاقوامی قانون کے فروغ میں مؤثر کردار ادا کرے۔ وزیراعظم اور میکی سال کی ملاقات بھی اسی عزم کی عکاس قرار دی جا رہی ہے۔
