امریکی پاپ اسٹار سیلینا گومیز، ان کی والدہ مینڈی ٹیفی اور سابق کاروباری ساتھی ڈینیئلا پیئرسن کے خلاف سیلینا گومیز مقدمہ دائر کیا گیا ہے۔ سرمایہ کاروں نے الزام عائد کیا ہے کہ انہیں ذہنی صحت کے اسٹارٹ اپ ونڈر مائنڈ کی صورتحال اور کاروباری معاملات کے بارے میں گمراہ کیا گیا۔
ڈیلاویئر کی عدالت میں جمع کرائی گئی درخواست کے مطابق دو گروپس سے تعلق رکھنے والے سرمایہ کاروں کا کہنا ہے کہ انہوں نے کمپنی میں تقریباً 1.2 ملین ڈالر کی سرمایہ کاری کی۔ درخواست میں تینوں پر سیکیورٹیز فراڈ، عام فراڈ اور معاہدے کی خلاف ورزی سمیت مختلف الزامات عائد کیے گئے ہیں۔
ونڈر مائنڈ کا آغاز 2021 میں ذہنی صحت سے متعلق ایک اسٹارٹ اپ کے طور پر ہوا تھا، جس کا مقصد لوگوں کو ذہنی صحت بہتر بنانے کے لیے آسان طریقے فراہم کرنا تھا۔ سیلینا گومیز کمپنی کی شریک بانی جبکہ ان کی والدہ مینڈی ٹیفی چیف ایگزیکٹو کے طور پر درج ہیں۔
سرمایہ کاروں کا دعویٰ ہے کہ انہیں یقین دلایا گیا تھا کہ ونڈر مائنڈ کے بڑے کمپنیوں کے ساتھ کاروباری معاہدے، اشتہاری شراکت داری، معروف شخصیات پر مبنی میگزین کورز اور ایک اہم ایپ بنانے کے منصوبے موجود تھے۔ تاہم درخواست کے مطابق یہ منصوبے عملی شکل اختیار نہیں کرسکے اور ایپ بھی تیار نہیں ہوئی۔
مقدمے میں کہا گیا ہے کہ سرمایہ کاروں کو کمپنی کی مالی مشکلات اور اندرونی مسائل سے مناسب طور پر آگاہ نہیں کیا گیا۔ درخواست میں دی گئی تفصیلات میں ایک رپورٹ کا حوالہ بھی دیا گیا جس میں کمپنی کے اندر اختلافات، مبینہ بدانتظامی اور سیلینا گومیز کی کمپنی میں شرکت سے متعلق سوالات اٹھائے گئے تھے۔
سرمایہ کاروں کے مطابق انہوں نے نومبر میں مینڈی ٹیفی سے اپنی رقم واپس کرنے کا مطالبہ کیا۔ ان کا کہنا ہے کہ ٹیفی نے جواب دینے کا عندیہ دیا لیکن کوئی واضح جواب نہیں دیا۔ اپریل میں ایک اور اطلاع کے جواب میں انہوں نے مبینہ طور پر کہا کہ انہیں لگا تھا سرمایہ کاری واپس کردی گئی ہے اور مزید معاملہ سیلینا کی قانونی ٹیم سے متعلق قرار دیا۔
سیلینا گومیز مقدمہ میں مزید دعویٰ کیا گیا ہے کہ مینڈی ٹیفی نے بعد میں سرمایہ کاری واپس کرنے کے لیے ایک ایسکرو اکاؤنٹ قائم کرنے کی بات کی۔ سرمایہ کاروں کے مطابق اس اکاؤنٹ کی تفصیلات فراہم نہیں کی گئیں اور ان کا دعویٰ ہے کہ ایسا کوئی اکاؤنٹ موجود ہی نہیں تھا۔ مدعیان اصل سرمایہ کاری، ہرجانے اور قانونی اخراجات کی وصولی چاہتے ہیں۔ یہ تمام الزامات سول مقدمے میں عائد کیے گئے دعوے ہیں جن کا عدالت میں حتمی فیصلہ ہونا باقی ہے۔
