سوئٹزرلینڈ کے شہر برگن اسٹاک میں وزیراعظم محمد شہباز شریف اور امریکی نائب صدر جے ڈی وینس کے درمیان اہم ملاقات ہوئی ہے۔ یہ ملاقات ایران اور امریکا کے درمیان جاری سفارتی مذاکرات کے تناظر میں غیر معمولی اہمیت اختیار کر گئی ہے، جہاں مختلف فریقین خطے میں امن اور استحکام کے لیے کوششیں کر رہے ہیں۔
وزیراعظم شہباز شریف اور فیلڈ مارشل سید عاصم منیر ایران-امریکا مذاکرات میں شرکت کے لیے سوئٹزرلینڈ میں موجود ہیں۔ ملاقات کے دوران باہمی تعلقات، علاقائی صورتحال اور جاری سفارتی عمل سمیت مختلف اہم امور پر تبادلہ خیال کیا گیا۔
امریکی نائب صدر جے ڈی وینس کے ہمراہ اعلیٰ سطحی امریکی وفد بھی موجود تھا، جس میں جیرڈ کشنر اور اسٹیو وٹکوف شامل تھے۔ وفد نے وزیراعظم شہباز شریف سے ملاقات کے دوران دوطرفہ تعلقات اور خطے کی تازہ صورتحال پر گفتگو کی۔
ذرائع کے مطابق پاکستانی اور امریکی قیادت کے درمیان ہونے والی ملاقات کو جاری سفارتی رابطوں کا اہم حصہ قرار دیا جا رہا ہے۔ دونوں ممالک کے درمیان مختلف شعبوں میں تعاون بڑھانے اور علاقائی استحکام کے لیے مشترکہ اقدامات پر بھی بات چیت ہوئی۔
سفارتی ذرائع کا کہنا ہے کہ امریکی وفد سے ملاقات کے بعد وزیراعظم شہباز شریف ایرانی وفد سے بھی ملاقات کریں گے۔ اس ملاقات میں ایران اور امریکا کے درمیان مفاہمتی عمل اور آئندہ کے لائحہ عمل پر تبادلہ خیال متوقع ہے۔
ایرانی وفد کی قیادت محمد باقر قالیباف کر رہے ہیں جبکہ وفد میں ایرانی وزیر خارجہ عباس عراقچی اور دیگر سینئر حکام بھی شامل ہیں۔ یہ ملاقاتیں خطے میں کشیدگی کم کرنے اور سفارتی پیش رفت کو آگے بڑھانے کے لیے اہم سمجھی جا رہی ہیں۔
