وزیراعظم شہباز شریف نے سعودی عرب کے قومی دن کے موقع پر سعودی قیادت اور عوام کو مبارکباد پیش کرتے ہوئے کہا ہے کہ پاکستان سعودی عرب کی خودمختاری، سلامتی اور اسلام کے مقدس ترین مقامات کے تحفظ کے لیے سعودی عرب کے ساتھ کھڑا ہے۔
اپنے پیغام میں وزیراعظم شہباز شریف نے کہا کہ سعودی عرب کی ترقی، خوشحالی اور کامیابیاں پاکستان کے لیے بھی باعثِ فخر ہیں۔ انہوں نے پاکستان اور سعودی عرب کے درمیان تاریخی، دیرینہ اور آزمودہ برادرانہ تعلقات پر فخر کا اظہار کیا۔
وزیراعظم کے مطابق دونوں ممالک کے درمیان تعلقات محمد بن سلمان کی قیادت میں مزید مضبوط اور جامع اسٹریٹجک شراکت داری میں تبدیل ہو رہے ہیں۔ ان کا کہنا تھا کہ اس شراکت داری کی بنیاد امن و سلامتی کے فروغ اور امت مسلمہ کے اتحاد کے لیے مشترکہ عزم پر قائم ہے۔
شہباز شریف نے سعودی عرب کے خلاف حوثیوں کے حالیہ حملوں کی بھی مذمت کی۔ انہوں نے بالخصوص مقدس شہر مکہ مکرمہ پر ڈرون حملے کی مبینہ کوشش کا حوالہ دیتے ہوئے کہا کہ پاکستان ایسے حملوں کی سخت ترین الفاظ میں مذمت کرتا ہے۔
وزیراعظم نے کہا کہ حرمین شریفین کی حرمت، تقدس اور سلامتی کو لاحق کسی بھی خطرے سے دنیا بھر کے مسلمانوں کے جذبات شدید متاثر ہوتے ہیں۔ انہوں نے مقدس مقامات کے تحفظ کو مسلمانوں کے لیے انتہائی اہم قرار دیا۔
شہباز شریف نے مزید کہا کہ پاکستان اور سعودی عرب نے اپنے مشترکہ عزم کے تحت اسٹریٹجک باہمی دفاعی معاہدے اور مکہ مشترکہ دفاعی معاہدے پر دستخط کیے ہیں۔ ان کے مطابق یہ اقدامات دونوں ممالک کے درمیان دفاعی اور اسٹریٹجک تعاون کی اہمیت کو ظاہر کرتے ہیں۔
