پی ایس ایل سعودی عرب کے انعقاد کے لیے پاکستان کرکٹ بورڈ (پی سی بی) ایک بڑے منصوبے پر کام کر رہا ہے، جس کے تحت سعودی عرب میں جدید کرکٹ اسٹیڈیم بنانے کی تجویز زیر غور ہے۔
ذرائع کے مطابق پی سی بی نے سعودی عرب کرکٹ فیڈریشن کے ساتھ مل کر جدہ میں اسٹیڈیم بنانے میں دلچسپی ظاہر کی ہے تاکہ پاکستان سپر لیگ کو بین الاقوامی سطح پر مزید وسعت دی جا سکے۔
پی ایس ایل سعودی عرب کا یہ منصوبہ اس لیے بھی اہم سمجھا جا رہا ہے کیونکہ وہاں بڑی تعداد میں پاکستانی اور ایشیائی تارکین وطن موجود ہیں جو کرکٹ سے گہری دلچسپی رکھتے ہیں۔
پی سی بی حکام اس وقت سعودی عرب میں مختلف مقامات کا جائزہ لے رہے ہیں تاکہ اسٹیڈیم کے لیے موزوں جگہ کا انتخاب کیا جا سکے۔ یہ منصوبہ ابھی ابتدائی مراحل میں ہے۔
اگر معاہدہ طے پا گیا تو اسٹیڈیم کی تعمیر جلد شروع ہو سکتی ہے اور امکان ہے کہ ایک سال کے اندر منصوبہ مکمل کر لیا جائے۔
اسٹیڈیم میں جدید سہولیات، فلڈ لائٹس اور بڑی تعداد میں شائقین کے بیٹھنے کی گنجائش رکھی جائے گی تاکہ بین الاقوامی معیار کے میچز کرائے جا سکیں۔
حکام کے مطابق یہ اقدام نہ صرف پاکستان کرکٹ کو عالمی سطح پر متعارف کرانے میں مدد دے گا بلکہ نوجوان کھلاڑیوں کے لیے بھی نئے مواقع پیدا کرے گا۔