ایران کے خلاف جاری جنگ میں امریکی فوجیوں کی ہلاکتوں کی تعداد پینٹاگون کے عوامی طور پر جاری کیے گئے اعدادوشمار سے زیادہ ہونے کا دعویٰ سامنے آیا ہے۔

امریکی اخبار واشنگٹن پوسٹ کی ایک رپورٹ کے مطابق امریکی محکمہ دفاع کے اندرونی جانی نقصان کے ریکارڈ سے واقف حکام نے ہلاکتوں کی تعداد سرکاری عوامی اعدادوشمار سے زیادہ بتائی ہے۔

رپورٹ کے مطابق 5 امریکی حکام نے بتایا کہ ایران کے ساتھ جنگ شروع ہونے کے بعد اب تک کم از کم 22 امریکی فوجی ہلاک ہوچکے ہیں۔ یہ تعداد پینٹاگون کے عوامی ڈیٹا بیس میں درج 18 ہلاکتوں سے 4 زیادہ ہے۔ ایک چھٹے امریکی اہلکار نے ہلاکتوں کی تعداد 23 تک بتائی، تاہم یہ وضاحت بھی کی گئی کہ تمام اموات کو براہ راست جنگی کارروائیوں سے جوڑنا ضروری نہیں۔

واشنگٹن پوسٹ کے مطابق جن امریکی حکام نے یہ معلومات فراہم کیں، وہ امریکی محکمہ دفاع کے اندرونی جانی نقصان کے اعدادوشمار سے واقف ہیں۔ حکام نے نام ظاہر نہ کرنے کی شرط پر معلومات فراہم کیں، جبکہ اضافی ہلاکتوں سے متعلق تمام تفصیلات فوری طور پر سامنے نہیں آسکیں۔

رپورٹ میں بتایا گیا ہے کہ ہلاکتوں کے اعدادوشمار میں فرق نے امریکی فوجی جانی نقصان کے ریکارڈ کو لے کر سوالات پیدا کردیے ہیں۔ پینٹاگون کی جانب سے عوامی سطح پر جاری کیے جانے والے اعدادوشمار اور اندرونی ریکارڈ سے واقف حکام کی فراہم کردہ معلومات میں واضح فرق نظر آتا ہے۔

پینٹاگون کے عوامی ڈیٹا بیس میں جمعے تک ایران جنگ کے دوران امریکی فوجیوں کی 18 ہلاکتیں درج تھیں۔ ان میں جنگی کارروائیوں کے علاوہ بعض غیر جنگی واقعات میں ہونے والی اموات بھی شامل ہیں۔ اسی عرصے کے دوران 820 سے زائد امریکی فوجیوں کے زخمی ہونے کی اطلاعات بھی سامنے آئی ہیں۔